Македонскиот институт за медиуми и Високата школа за новинари (ВШН), годинава, во соработка со највлијателните медиуми, ќе доделат 10 целосни стипендии за Студиите по новинарство, како и десет делумни во висина од 1.100 евра за отсекот односи со јавност. Жанета Трајкоска, директорка на ВШН, вели дека за да се добијат овие стипендии нема да биде пресуден успехот на матурантите, туку нивните идеи и креативност.
- Со доделувањето на овие стипендии сакаме да им помогнеме на талентираните матуранти што немаат доволно средства да се запишат на овој факултет, а се креативни. Школата им нуди додипломски студии, каде што акцент се става на практиката во новинарството. Заинтересираните матуранти пријавите може да ги преземат од веб-страницата њњњ.вс.еду.мк. Крајниот рок за пријавување е 18 април годинава. Темата на годинешниот проект е „Имам право да бидам различен“, поточно матурантите ќе треба да достават идеи за телевизиски прилог, спот, постер или фотографија против сите видови дискриминација. До почетокот на мај ќе бидат избрани најдобрите идеи, а во јуни на избраните матуранти ќе им бидат доделени дипломите за проектите, како и стипендиите. За да ја задржат стипендијата, идните студенти ќе треба да имаат просек од 8,5, а во текот на летото ќе посетуваат еден месец практика во редакцијата од која ја добиле стипендијата. Оние што ќе добијат делумна стипендија ќе треба да доплатат уште по 750 евра - вели Трајковска.