Информативната полезност од социјалните мрежи и општествената одговорност на оние кои ги користат беше тема на која зборуваше гостинот предавач Новица Наков, член на организација „Слободен Софтвер Македонија“ пред студентите по новинарство и односи со јавноста.

Тој сугерираше дека информативната целисходност на социјалните мрежи е сомнителна. Скепсата, како што посочи, доаѓа оттаму што најголемиот број корисници на нив објавуваат содржини за забава, а не и содржини вредни за објавување.

Освен тоа, тој е скептичен и околу целисходноста на дебатата која се одвива преку нив, со оглед на тоа што таа најчесто се случува помеѓу „истомисленци“. Како што рече, вмрежените заедници се креираат од луѓе кои најчесто имаат слични ставови за општествените проблеми:  „Јас на Твитер ги следам оние луѓе со кои имам блискост во ставовите“, вели Наков.

Правејќи споредба на архетипот на суперхерои кои се и физички и морално „над-луѓе“, со идејата за новинарите како чувари на јавниот интерес, тој сугерираше дека општествената одговорност во јавната сфера треба да се бара во новинарството, не во граѓанското новинарство. „Не е случајно тоа што суперхероите се истовремено и новинари“, рече Наков.

На предавањето беа елаборирани и критички анализирани тезите на Бил Ковач, Итан Закерман и Евгениј Морозов за врските меѓу демократизацијата и развојот на интернетот, а беше зборувано и за така наречената мим (meme) култура која е актуелна на социјалните мрежи како своевидна визуелно-текстуална критика на општествените прашања.

Посетата на гостинот беше реализирана во рамките на предметот Мултимедија.